Lind pa qiellzën e gojës, ushqehet nga zgavra e hundës

Pacientja 3-muajshe Ivana ka lindur me defekt, ç'ka e bën të pamundur ushqyerjen e saj në mënyrë normale. Peshon vetëm 3 kilogram e gjysëm

Nuk ka mundur të ushqehet kurrë si gjithë fëmijët e tjerë. Ivana 3-muajshe ka lindur me një defekt tepër të rrallë, dhe pikërisht pa qiellzën e gojës, çka e bën të pamundur ushqyerjen e saj në mënyrë normale. Për shkak të kësaj, qumështin është e detyruar ta marrë përmes një aparature në të cilën lidhet një tub që përcjell qumështin dhe medikamentet nga zgavra e hundës, deri në fyt. Por problemi i saj nuk mbaron këtu pasi defekti i lindur e ka lënë atë vetëm 3 kg e gjysmë, edhe pse është 3-muajshe dhe duhej të kishte të paktën dyfishin e kësaj peshe. Sipas doktoreshës, Luljeta Mati, pranë Pediatrisë së Qendrës Spitalore Universitare "Nënë Tereza", Ivanës mund t'i korrigjohet defekti me anë të një ndërhyrjeje kirurgjikale por kjo mund të realizohet vetëm kur ajo të jetë 14-muajshe dhe të peshojë minimumi 8 kilogram, mision i cili duket tepër i vështirë. Por si të mos mjaftonin këto, nëna e vogëlushes, Ornela Dollapaj pohon se gjendja e saj ekonomike është tepër e vështirë dhe e ka të pamundur të sigurojë qumështin dhe medikamentet që i nevojiten.

Defekti

Ardhja në jetë e bebes Ivana ka qenë gëzimi i parë për familjen Dollapaj, por ky gëzim do të venitej pasi të merrnin vesh se Ivana nuk do të mund të ushqehej kurrë nga gjiri i nënës së saj. Megjithatë, mami Ornela tregon se kanë shpresa që Ivanës t'i korrigjohet defekti dhe të jetojë si gjithë fëmijët e tjerë. "Mjekët e kuptuan që kur lindi, se vajza kishte lindur pa qiellzën e gojës dhe kjo nuk do ta lejonte atë të ushqehej nga gjiri im e as me biberon normal, siç ushqehen të gjitha bebet e tjera",- thekson mami Ornela, e cila është vetëm 20-vjeçe. Ajo pohon se Ivana ka lindur 2 kilogram e gjysëm dhe pas 3 muajsh ajo ka shtuar vetëm 1 kilogram dhe kjo pikërisht për shkak të defektit që ka dhe që e pengon për t'u ushqyer në mënyrë normale. Në fillim bebja është ushqyer me anë të një biberoni të veçantë por edhe kjo nuk i ka bërë punë, pasi goja e saj është tepër e vogël për ta mbajtur dhe, edhe atë pak qumësht që pinte, e villte. Tashmë trishtohet, kur shikon që vajza e saj ushqehet në një mënyrë që kurrë nuk do ta kishte imagjinuar. "Ushqimin në spital e merr me anë të kësaj aparature dhe tubin që shikoni, i kalon nga zgavra e hundës deri në fyt, në mënyrë që qumështi t'i përcillet deri në bark",- thotë mami Ornela. Megjithatë, Ornela, me shpresën që i kanë dhënë mjekët, është tepër optimiste që bebja e saj do ta kalojë këtë situatë. Madje ajo e shikon vajzën e saj si tepër të shkathët për moshën që ka. "Ivana është tepër e dobët për shkak të defektit me të cilin ka lindur por ajo është e shkathët dhe habitesh kur e shikon që lëvizjet e saj janë të shpejta. Ajo ka mundur ta heqë vetë edhe tubin me të cilin merr ushqimin në spital",- pohon Ornela. Ndërkohë ajo tregon se prej një muaji është e shtruar në Pediatrinë e QSUT-së pasi mungesa e ndihmës së mjekëve do ta rrezikonte seriozisht vajzën e saj. Kështu, Ivanës i është dashur të jetojë më shumë në spital, se në shtëpinë e saj. Në fakt, ajo duket një bebe tepër e rrallë pasi të habit me shkathtësinë e saj, edhe pse është shumë e vogël për moshën që ka. Të ndjek me sy sapo i afrohesh dhe të qarat e saj dëgjohen tepër rrallë, edhe pse ato janë K*rakteristike për bebet 3-muajshe. Tashmë të gjithëve nuk u mbetet gjë tjetër, vetëm të shpresojnë që ajo të shtojë në peshë dhe të përballojë operacionin për t'i korrigjuar defektin e lindur".

2 kilogram e gjysëm ka lindur pacientja Ivana Dollapaj

3 kilogram e gjysëm peshon aktualisht pacientja 3-muajshe

8 kilogram duhet të jetë pacientja për t'iu nënshtruar operacionit

14 muajshe duhet të jetë pacientja që t'i nënshtrohet operacionit

Prindërit e pacientes falënderojnë mjekët që kanë dhuruar vetë gjak për Ivanën. Mjekët: Duhen plotësuar parametrat, që të bëhet operacioni

Mjekët: Ky është një defekt tepër i rrallë

Pediatria është bërë si shtëpi për Ivanën 3-muajshe dhe prindër të dytë duket se janë bërë mjekët. Mjekët pohojnë se ky është një defekt tepër i rrallë dhe që Ivana t'i nënshtrohet operacionit, duhet të arrijë peshën dhe të mos ketë probleme të tjera, në mënyrë që të përballojë ndërhyrjen kirurgjikale. "Është një fëmijë tepër vital, që po mbahet nën mbikëqyrje korrekte nga mjekët dhe shpresojmë që ajo do ta kalojë këtë problem",- pohon doktoresha që e ka ndjekur, Luljeta Mati, duke shpjeguar se defekti në gjuhën mjekësore quhet "Maloformacion kongonital". Sipas saj, ky defekt ka të bëjë pikërisht me dëmtim të qiellzës së gojës ç'ka e bën të pamundur ushqyerjen e saj në mënyrë normale. "Kjo ka sjellë edhe këtë situatë me beben, duke e lënë atë në një peshë tepër të vogël për shkak të kequshqyerjes, ç'ka i ka sjellë asaj edhe komplikacione të tjera",- pohon Luli Mati. Sipas saj, defekti i Ivanës mund të korrigjohet por vetëm nëse ajo arrin peshën normale dhe nuk ka probleme të tjera. Pesha e Ivanës, në mënyrë që të përballojë operacionin, duhet të jetë të paktën 8 kilogram, deri kur të bëhet 14-muajshe. "Përveç peshës, pacientja nuk duhet të ketë as probleme të tjera, si anemi, bronkopneumoni dhe anomali të tjera, pasi kjo do ta bënte të pamundur që ajo të përballonte ndërhyrjen kirurgjikale",- shpjegon doktoresha, duke shtuar se kjo është edhe arsyeja që Ivana mbahet nën mbikëqyrjen e mjekëve. Ndërkohë, prindërit e Ivana Dollapajt falënderojnë bluzat e bardha për ndihmën maksimale që i kanë dhënë fëmijës së vetme të tyre, pasi ata nuk kanë kursyer as gjakun e tyre, duke i dhuruar asaj 2 herë gjak. Sipas mami Ornelës, foshnja e saj ka grup gjaku të rrallë dhe kur ajo kishte nevojë për transfuzion, doktoreshat dhuruan gjak për të pasi kishte mungesa në bankën e gjakut. "Doktoreshë Rajmonda i dhuroi 2 herë brenda javës gjak Ivanës sepse ajo ishte me anemi dhe nuk po gjenim dhurues për të. E falënderojmë nga zemra doktoreshë Rajmondën dhe të gjithë mjekët që po më mbajnë në jetë foshnjën time të vetme",- pohon Ornela Dollapaj, duke shtuar se lutet gjithmonë që vajza e saj të jetojë e të bëhet mirë si të gjithë fëmijët e tjerë.

e.bardhi

Prindërit bëjnë apel për të ndihmuar financiarisht foshnjën e tyre

Ivana 3-muajshe ka lindur me një defekt të rrallë, por asaj i duhet të vuajë edhe varfërinë e prindërve të saj. E ndërsa nuk ka mundur të ushqehet kurrë nga gjoksi i nënës së saj, kjo e fundit pohon se e kanë tepër të vështirë t'i sigurojnë asaj ushqimin special për ta mbajtur në jetë. "Me qumështin e vajzës dhe medikamente të tjera, shpenzoj afërsisht 100 mijë lekë në muaj (të vjetra) dhe e kam të pamundur për t'i siguruar ato gjithmonë",-pohon Ornela Dollapaj, e cila thekson se vetë ajo dhe bashkëshorti janë të papunë. Sipas saj, janë të afërmit e tyre që i ndihmojnë sadopak për të përballuar shpenzimet, por kjo është e pamjaftueshme. "Më vjen keq, që foshnja ime nuk mundi kurrë të ushqehet me qumështin e nënës së saj, por edhe për ushqimin që më duhet t'ia blej, gjendem përpara vështirësive sepse asaj i duhet gjithmonë qumësht special për të shtuar në peshë",- thotë mami Ornela. Sipas saj, mjekët e kanë rekomanduar që qumështi të jetë i përbërë sipas formulave të caktuara dhe me proteina, i cili është i kushtueshëm. "Shpresoj që dikush të lexojë apelin tim dhe të na ndihmojë sadopak, për të përballuar shpenzimet e foshnjës time të vetme",- thotë Ornela me një vështrim të trishtueshëm, që i lexohet lehtë në fytyrë.