11 Mars 2008

Paketa e PS për zgjedhjet: Sistem proporcional rajonal
Valentina Leskaj shprehet se paketa e PS-së nuk favorizon një forcë të vetme politike
TIRANË- Kundërshtimi i të "vegjëlve" nuk ka ndryshuar aspak qëndrimin e dy partive të mëdha për reformën zgjedhore. Partia Socialiste dhe Partia Demokratike kanë shfaqur edhe një herë dje vullnetin e plotë për të miratuar me konsensus, së pari, ndryshimin e Kushtetutës dhe më pas të Kodit Zgjedhor, duke synuar kalimin nga sistemi i përzier mazhoritaro-proporcional, në një sistem proporcional-rajonal. Në vijim të këtij qëndrimi, socialistët me anë të kryetares së grupit të tyre parlamentar, Valentina Leskaj, kanë paraqitur dje në mënyrë zyrtare, në Konferencën e Kryetarëve në Kuvendin e Shqipërisë, nismën ligjore për ndryshimin e Kushtetutës, në nenin që bën fjalë për organizimin e zgjedhjeve. Me kërkesën e Leskajt, Konferenca e Kryetarëve ka miratuar propozimin për të futur në kalendarin e punimeve trejavore të Kuvendit nismën për amendimin e Kushtetutës në nenin 64 të saj.
Drafti
Partia Socialiste ka depozituar dje në Kuvend nismën e saj ligjore për amendimin e Kushtetutës, për t'i hapur rrugë më pas ndryshimit të Kodit Zgjedhor edhe në ato nene që kërkojnë një shumicë të cilësuar votash. Drafti i paraqitur nga socialistët përmban propozimin e dy neneve me anë të të cilave kërkohet ndryshimi i nenit 64 të Kushtetutës. Sipas nenit 1 të këtij propozimi, kërkohet që në nenin 64 të Kushtetutës, të sanksionohet që Kuvendi të përbëhet nga 140 deputetë të zgjedhur mbi bazën e sistemit zgjedhor proporcional, me zona zgjedhore shumemërore ose siç njihet ndryshe proporcional-rajonal. Caktimi i zonave zgjedhore shumemërore do të bazohet në ndarjen administrative të Republikës së Shqipërisë, pra, në 12 qarqe. Ndërkohë që kriteret dhe rregullat për zbatimin e sistemit zgjedhor proporcional për caktimin e zonave zgjedhore dhe për numrin e mandateve për secilën zonë, do të përcaktohen në ligjin për zgjedhjet.
Leskaj
Duke prezantuar para medias nismën për amendimin e Kushtetutës, kryetarja e grupit kuvendor të PS-së, Valentina Leskaj është shprehur se, thelbi i tyre është krijimi i një sistem zgjedhor që nuk është në favor të një force të vetme politike, por është në favor të Shqipërisë dhe të zgjedhjeve të lira dhe të ndershme. Nisur nga ky qëllim, ajo i ka bërë thirrje dhe forcave të tjera politike, përfshi këtu dhe ato të cilësuara të vogla, që të bëhen bashkëpunuese dhe të paraqesin mendimet e tyre në lidhje me këtë propozim. "Ne e kemi thënë që jemi të hapur për një proces gjithëpërfshirës dhe konsensual për miratimin e ndryshimeve kushtetuese, përfshirë edhe partitë e vogla. Unë besoj se forcat e tjera politike do ta mbështesin këtë, po ta shohin me kujdes. Ky është një sistem që nuk është në favor të një force të vetme politike, por është në favor të Shqipërisë, është në favor të zgjedhjeve të lira dhe të ndershme në Shqipëri", - u shpreh Leskaj. Gjithashtu, ajo nuk ka përjashtuar mundësinë që në paketën e ndryshimeve kushtetuese të përfshihen dhe elementë apo çështje të tjera. Megjithatë, pavarësisht vullnetit apo dëshirës së partive të vogla, PS dhe PD, duket se së bashku kanë arritur që të sigurojnë dhe 94 votat e duhura për të miratuar ndryshimet kushtetuese.
Amendimet
Neni 64 i Kushtetutës, ndryshohet si vijon:
1. Kuvendi përbëhet nga 140 deputetë, të zgjedhur mbi bazën e sistemit zgjedhor proporcional me zona zgjedhore shumemërore.
2. Caktimi i zonave zgjedhore shumemërore bazohet në ndarjen administrative të Republikës së Shqipërisë.
3. Kriteret dhe rregullat për zbatimin e sistemit zgjedhor proporcional, për caktimin e zonave zgjedhore dhe për numrin e mandateve për secilën zonë përcaktohen në ligjin për zgjedhjet.
Pika 2 e Nenit 68, ndryshohet si vijon:
Rregullat për caktimin e kandidatëve, për regjistrimin e zgjedhësve, për zhvillimin e fushatës zgjedhore, administrimin, shpalljen e rezultateve dhe vlefshmërinë e zgjedhjeve, si dhe rregullat e tjera të nevojshme për zhvillimin e zgjedhjeve, përcaktohen në ligjin për zgjedhjet.