10 Mars 2008

Ilir Paja, gjyq në dhomën e spitalit ku po kurohet

Gjykata ka zhvilluar dje seancën në spital dhe ka lënë Pajën në burg pa afat. Transferohet në spitalin e burgut


Avokati: Ai nuk deshi që të vriste policin kur e goditi me makinë por ishte thjesht një aksident



TIRANË- Mjeshtri i arratisjeve, Ilir Paja, i cili plagosi një polic teksa po tentonte t'iu shpëtonte prangave, do të qëndrojë në burg deri në përfundim të hetimeve për vrasje të mbetur në tentativë. Gjykata e Tiranës ka dhënë ditën e djeshme masën e sigurisë burg pa afat për 35-vjeçarin i cili u arrestua më gjashtë mars pasi ishte shpallur person në kërkim ndërkombëtar. Për kapjen e të kërkuarit u organizua një operacion katër ditë më parë por që përfundoi me plagosjen e tij dhe të një polici i cili aktualisht ndodhet në gjendje të rëndë shëndetësore. Paja tentoi t'iu shpëtonte makinave të policisë që i zunë rrugën duke lëvizur mbrapsht me makinë kur dhe ka përplasur një polic që ndodhej pas tij me motor. Menjëherë policët e tjerë kanë qëlluar me pistoletë Pajën i cili mori një plumb në shpatull.



Masa e sigurisë



Nga operacioni për kapjen e tij Ilir Paja mbeti i plagosur dhe u transportua me urgjencë në spital ku dhe ndodhet aktualisht. Duke marrë parasysh gjendjen e tij shëndetësore por edhe "aftësinë" për t'u arratisur shumë shpesh, ditën e djeshme një gjyqtar, avokati i tij dhe prokurori janë paraqitur në spitalin ku ndodhet i shtruar 35-vjeçari i arrestuar me qëllim caktimin e masës së sigurisë ndaj tij. Seanca është improvizuar në dhomën e spitalit ku ndodhet Paja dhe gjykata ka dëgjuar pretendimet e provat e të dyja palëve. Ndaj tij rëndojnë një sërë akuzash të rënda për vrasje, përdhunim, trafikim droge etj, të cilat janë formuluar nga prokuroria e Gjermanisë e cila e kishte shpallur në kërkim. Ndërkohë që Pajës i janë shtuar dhe dy akuza ajo e vrasjes për shkak të cilësive të veçanta e mbetur në tentativë dhe armëmbajtjes pa leje. Të dyja këto akuza kanë lidhje me ngjarjen e gjashtë marsit kur ai goditi me makinë një punonjës policie. Ilir Paja nuk ka folur në seancën e improvizuar në spital për masën e sigurisë, gjë për të cilën kishte ngarkuar avokatin e tij. Ky i fundit ka deklaruar se Paja nuk e pranon faktin se ka tentuar të vrasë policin duke i kërkuar gjykatës të heqë këtë akuzë. Sipas avokatit, Paja e ka goditur me automjetin e tij pa dashje policin dhe gjithçka ka ndodhur aksidentalisht. Avokati ka pohuar se Paja nuk e kishte vënë re motorin që ndodhej pas makinës së tij dhe kur ka tentuar të lëvizë mbrapsht, e ka goditur atë. Nga ana e saj, prokuroria ka paraqitur të gjitha materialet e mbërritura nga Italia e Gjermania në lidhje me akuzat që rëndojnë mbi 35-vjeçarin. Përveç tyre, organi i akuzës ka paraqitur edhe provat shqiptare, të cilat tregojnë se Paja kishte dijeni të plotë që po ndiqej nga policia dhe goditja e efektivit nuk ishte rastësore por e paramenduar. Në fund të seancës gjyqtari nuk ka marrë parasysh kërkesën e avokatit mbrojtës duke vendosur masën e sigurisë arrest me burg pa afat për të pandehurin ndërsa ka quajtur të vlefshme akuzat e ngritura nga prokuroria. Pak minuta pas seancës, Ilir Paja është transferuar ngaspitali ku ndodhej, nëspitalin e burgut ku dhe do të kurohet.



Ngjarja



Paja plagosi policin që po e ndiqte me motor




Ngjarja për të cilëni janë shtuar dy akuzat Ilir Pajës ndodhi mesditën e datës 6 mars të këtij vitit pranë kryqëzimit te "Farmacia nr.10" në Tiranë, gjatë një operacioni policor për kapjen e tij. Paja po udhëtonte me një automjet me ngjyrë gri me targa të huaja kur ka konstatuar se i kishin zënë rrugën një makinë policie e cila kërkonte ndalimin e tij. Ndërsa nga pas ndodhej polici Bledi Haxhimali i cili po e ndiqte me motor. Ndërkohë që Pajaka lëvizur me makinë mbrapsht për t'iu larguar policisë duke rrezikuar jetën e Haxhimalit të cilin e ka goditur. Polici ka rënë nga motori disa metra larg duke marrë plagë të rënda. Sapo kanë parë skenën kolegët e të plagosurit kanë qëlluar me pistoletë në drejtim të të kërkuarit duke e plagosur rëndë në shpatull. Mësohet se gjendja e policit vazhdon të jetë e rëndë ndërsa ndodhet në kujdesin e mjekëve. Ilir Paja cilësohej si një person me rrezikshmëri të lartë pas arratisjeve të bujshme nga burgjet italiane. Ai kishte mundur të arratisej dy herë nga burgjet e Italisë ku ndodhej për llogari të drejtësisë Gjermane e cila i kishte faturuar atij një sërë akuzash të rënda. K.K

Arratisja 1



Ikja me litarin e bërë nga çarçafët



Mjeshtri i arratisjeve nga burgu në Itali ishte 35-vjeçari Ilir Paja me akuza të rënda mbi "supe". Megjithëse nën masa të rrepta sigurie Paja kishte mundur të arratisej duke u kthyer dhe në një nga personat më të kërkuar në Itali. Arratisja e parë e shqiptarit u krye në qershor të vitit 2006 kur ai kishte rreth gjashtë muaj që ishte izoluar në burgun e Perugias. Ai studioi në mënyrë perfekte burgun duke llogaritur edhe lartësinë e mureve dhe kohën që i duhej për t'u arratisur në mënyrë që të përgatiste dhe planin. Kështu krijoi me çarçafët e dhomës një litar rreth dhjetë metra të gjatë dhe më 11 qershor të vitit 2006 kur ai bashkë me të burgosurit e tjerë kishin dalë në oborrin e burgut gjatë orës së ajrimit ka shfrytëzuar momentin kur policët nuk e kishin mendjen për të zbritur me çarçafët që kishte improvizuar si litarë. Më shumë se tre muaj zgjati liria e Pajës në arrati pasi policët e arrestuan sërish në një nga provincat e Milanos. Edhe në këtë rast Paja kishte tentuar t'i ikte policisë duke u hedhur nga kati i tretë i pallatit ku ndodhej. Paja u kap së bashku me një tjetër shtetas shqiptar ndërkohë që në apartamentin e tyre u gjetën edhe dy prostituta rumune. Një prej tyre kishte shenja të dukshme dhune në trup dhe një plagë të shkaktuar me armë zjarri.



Arratisja 2

Mashtrimi i ambulancës së burgut



Por nuk do të kalonte shumë kohë dhe Paja do të arratisej sërish në rrethana krejt spontane pa kryer plane. Teksa po transferohej me një ambulancë nga njëri burg tek tjetri ai ka përfituar nga një ndalesë në autostradë për t'iu shmangur rojeve të policisë dhe të arratiset. Paja i ka kërkuar policisë që të marrë pak ajër pasi ai nuk ndihej mirë. Punonjësit e policisë kanë dalë nga makina duke nxjerrë jashtë edhe 34- vjeçarin shqiptar por pa i hequr prangat nga duart. Në një moment ai ka mbetur vetëm me një prej policëve dhe këtu ka ndodhur edhe arratisja. Paja ka goditur policin dhe pasi e ka shtrirë përdhe është larguar me vrap pa këpucë në këmbë dhe pa hequr as prangat nga duart. Efektivët e tjerë të policisë kanë dhënë alarmin. Madje ata kanë qëlluar disa herë në drejtim të shqiptarit që po arratisej. Në të gjithë zonën kanë nisur kërkimet për gjetjen e të arratisurit por pa rezultat. Në orët e vona të mbrëmjes janë gjetur pantallonat e tij, dhe një pjesë e rrobave të burgut. Dyshimet e policisë janë se Paja ka mundur të heqë prangat dhe të ndërrojë rrobat në mënyrë që të mos dallohet.

Akuzat


Vrasje, trafik droge, vjedhjet e vilave, rrëmbim personi, dhuna seksuale dhe shfrytëzim prostitucioni. Këto janë akuzat që rëndojnë mbi Ilir Pajën. Ai ishte arrestuar fillimisht pas një kërkese të bërë nga policia gjermane. Paja akuzohet se ka vrarë një tjetër shtetas shqiptar në Duisburg të Gjermanisë. Pas arratisjes së parë ai u akuzua nga policia italiane edhe për një vrasje dhe një plagosje që kishin lidhje me trafikun e femrave. Ai u arrestua nga policia italiane me qëllim ekstradimin e tij drejt Gjermanisë por arratisja e tij e shpëtoi nga izolimi në burgjet e Gjermanisë. Ndërkohë që Paja prej disa kohësh strehohej në Shqipëri ku dyshohet se ka kryer një vrasje. Prej më shumë se një muaj policia e Tiranës kishte siguruar informacione se ai ndodhej në kryeqytet. Ndërsa dje ai është përballur me policinë së cilës i ka bërë rezistence duke rrezikuar jetën e një agjenti, por ka rënë në pranga.