10 Mars 2008

Berisha: Çamët? Kufiri Greqi-Shqipëri, i paprekshëm

Berisha tha se çështja e emrit të Maqedonisë nuk prek vetëm Shkupin dhe Athinën, por tërë Ballkanin


TIRANË- Qeveria shqiptare hedh poshtë çdo diskutim lidhur me idenë e Shqipërisë së Madhe. Krijimi i shtetit të pavarur të Kosovës nuk do të ketë asnjë ndikim në trojet e tjera të banuara me shqiptarë jashtë kufijve zyrtar të shtetit shqiptar, qoftë në Maqedoni ashtu edhe në Greqi. Kryeministri shqiptar Sali Berisha gjatë një interviste për gazetën greke "Kathemerini" ka konfirmuar se shteti shqiptar vazhdon ti mbetet pro filozofisë së frymës së bashkëjetesës me fqinjët e tij. I pyetur në lidhje me ndikimin që mund të ketë pavarësia e Kosovës tek popullsia shqiptare që banon jashtë kufijve të Shqipërisë, dhe konkretisht tek popullsia çame, kreu i ekzekutivit shqiptar është shprehur se pavarësisht çështjeve të pronësisë që ekzistojnë për këtë çështje kufijtë mes Shqipërisë dhe Greqisë janë të paprekshëm. "Në lidhje me çështjen çame ekzistojnë disa çështje pronësie në aspektin juridik në këtë rajon, por se kufijtë mes Greqisë dhe Shqipërisë janë të paprekshëm", - është shprehur Berisha.

Ndërkohë gjatë kësaj interviste kryeministri shqiptar ka komentuar dhe zhvillimet rajonale, ku ka theksuar se anëtarësimi i vendeve të A3 në NATO do ti jepte një tjetër ritëm bashkëpunimit midis shteteve ballkanike. Duke folur për çështjen e debatit midis Greqisë dhe Maqedonisë në lidhje me emrin e kësaj të fundit, kryeministri shqiptar ka theksuar se çështja e emrit të Maqedonisë nuk prek vetëm Shkupin dhe Athinën, por tërë Ballkanin. Sipas Berishës, bisedimet midis palës maqedonase dhe greke janë në etapën më vendimtare, ndërsa siç theksoi ai, Shkupi e ka të qartë se vetoja greke kundër anëtarësimit të Maqedonisë në NATO nuk është vetëm kërcënim gojor, por një vendim i qartë. Ndërkohë duke folur për rolin e Shqipërisë në këtë debat ai ka bërë të qartë se shteti shqiptar mbetet për një zgjidhje të pranueshme nga të dyja palët dhe të miratuar nga Bashkimi Evropian.