10 Mars 2008

Konfliktet për pronën, motivi kryesor i vrasjeve

Shkodër, brenda dy muajve kanë ndodhur dy vrasje për motive pronësie. Banorët: Tokat tona janë mbivendosur

SHKODËR- Problemet e mbivendosjes së pronave dhe zënies padrejtësisht të tokës në rrethin e Shkodrës janë kthyer në një burim konfliktesh të rënda që kanë përfunduar shpesh herë edhe me vrasje. Që nga fillimi i këtij viti, nga katër vrasje të ndodhura në këtë qark, tre kanë qenë për motive pronësie. Madje dy prej tyre ishin brenda familjes e fisit me shkak konfliktin për pronësinë e tokës. Pronësia e tokës vazhdon të jetë problematike në Shkodër, ku thuajse çdo ditë fermerë të fshatrave të këtij rrethi ankohen për pushtim të tokës nga persona të tjerë. Në total, brenda gjashtë muajve të fundit, në këtë zonë kanë ndodhur pesë të vrarë e tre të plagosur për probleme të ndryshme pronësie. Statistikat zyrtare flasin se çdo vit, vetëm në Malësinë e Madhe ndodhin të paktën dy vrasje ku motivi është prona.



Lush Gjerovoina nga fshati Stajkë shprehet se prej shumë vitesh sillet në dyert e shtetit për të marrë atë çfarë i takon me ligj si gjithë të tjerët, por kjo i mohohet. Sipas 70- vjeçarit, ai ka trashëguar nga babai i tij rreth 10 dynym tokë dhe një shtëpi të djegur në fshatin Stajkë, por toka i është copëtuar dhe aktualisht ai jeton nëpër banesa me qira pa shtëpi dhe pa asnjë metër tokë. Ankesat e tij kanë rënë në vesh të shurdhër edhe pse disponon dokumente të tokës së trashëguar. Por rasti i tij duket se nuk është i vetëm. Vetëm në komunën e Bushatit, një ndër komunat më të mëdha të këtij qarku janë evidentuar 1025 raste ku toka është pushtuar pjesërisht ose plotësisht, ndërsa në mjaft raste kur toka publike është zënë nga persona të ndryshëm të cilët pa asnjë dokument kanë mundur ta regjistrojnë atë tokë në zyrën e regjistrimit të pasurisë së paluajtshme dhe duke marrë certifikatën përkatëse.



Tafil Fetahu, banor i fshatit Kosmaç, tregon se nga 16 dynym tokë që përfitoi sipas ligjit, realisht ka në zotërim vetëm 3 dynym. "Jemi nëntë vetë në familje, nuk kam punë as rrogë dhe toka është e vetmja mundësi për të jetuar. Ajo është zënë nga të tjerë që madje kanë arritur të marrin dhe çertifikatë pronësie, ndërsa unë disponoj tapinë sipas ligjit 7501 dhe vendimin e komisionit të ndarjes së tokës",- pohon ai. Simon Pjetri, një tjetër banor shprehet se ka tre vjet që sillet zyrave për të marrë të drejtën mbi 2.1 ha tokë dhe akoma nuk gjen zgjidhje. Broz Rrotani, nga fshati Rranxa, shprehet se ka 12 dynym tokë që i është pushtuar nga banorë të një tjetër komune, asaj të Berdicës . "Jemi munduar të merremi vesh, t'iu japim dhe paratë e punimit të tokës por nuk na është rikthyer. Nuk na e ka marrë mendja ta mbrojmë me gjak tokën tone. Kërkoj nga shteti që t'i japë zgjidhje këtij problemi duke ma dhënë pa konflikte tokën që e kam në dokumente ose duke ma kompensuar diku tjetër, apo dhe paguar .Si unë ka dhe të tjerë pasi janë 7 ha tokë që unë e kushërinjtë e mi kemi dokumente që na takon ne, por e përdor tjetër kush",- tregon Rrotani. Gjatë një takimi ku ishin të pranishëm edhe përfaqësuesit e pushtetit vendor, dhjetëra fshatarë të zonës kanë paraqitur ankesat e tyre për mbivendosjet e tokave. Ata kanë treguar edhe regjistrat ku për të njëjtën sipërfaqe toke ekzistojnë dy apo më shumë pronarë. Kryeplaku i Bushatit, Zejdi Mustafa, tregon se toka iu nda banorëve të këtij fshati pjesërisht në fshat dhe pjesërisht në tokat e ish- ndërmarrjes bujqësore.

Në fshatin Kosmaç janë 102 familje që kanë probleme me mbivendosje prone. Refik Zagani nga fshati Shkjezë shprehet se 46 ha tokë e këtij fshati paraqet probleme pasi toka është ndarë duke i rënë fshatit në mes dhe ka krijuar mjaft probleme që nga viti 1992. Për këtë çështje janë hapur gjyqe, ka pasur rrahje, konflikte, greva urie por zgjidhje nuk është dhënë. Në total janë 1025 familje së shpresojnë të marrin tokën që i takon sipas ligjit ndërsa komuna Bushat do të kërkojë ekspertë nga zyra qendrore e regjistrimit të pasurive për të vërtetuar atë që ka ndodhur. Problemet me pronësinë e tokës ka veçanërisht në komunat e Velipojës, Bushatit, Rrethinave, Gruemirës, Kastratit etj