10 Mars 2008

KLD: Do verifikojmë vetë pasuritë e gjyqtarëve

"Kjo kompetencë ligjore e KLD-së do të shërbejë për të hedhur dritë mbi vërtetësinë e deklarimeve"

TIRANË- Akuzat e shumta për korrupsion në radhët e gjyqtarëve kanë bërë që Këshilli i Lartë i Drejtësisë të ngrejë një "zyrë paralele" me Inspektoratin e Lartë të Deklarimit dhe Kontrollit të Pasurive. Qëllimi i kësaj është verifikimi më i hollësishëm edhe nga ana e KLD-së të të gjitha pasurive të gjyqtarëve në të gjithë Shqipërinë. Ky projekt është prezantuar dje nga Drejtorja Juridike e KLD-së, Ana Shkëmbi. Ajo shpjegoi dje se të gjithë gjyqtarët kanë afat deri më datë 31 mars për të depozituar deklarimet periodike të pasurisë. Brenda kësaj date këto deklarime duhet të dorëzohen në ILDKP e më pas të nisë procesi i verifikimit të tyre. Por KLD-ja i ka kërkuar këtyre gjyqtarëve që të jenë të kujdesshëm me deklarimet pasi ato tashmë do të verifikohen dy herë. "KLD do të fillojë verifikimin e deklarimeve të pasurive të gjyqtarëve menjëherë pas përfundimit të afatit ligjor, i cili është 31 marsi.

Kjo kompetencë ligjore e KLD-së, e pa praktikuar më parë, do të shërbejë për të hedhur dritë mbi vërtetësinë e deklarimeve si dhe për të verifikuar çdo rast të papajtueshmërisë së veprimtarisë së gjyqtarëve apo sjelljes së tyre me kërkesat e ligjit",- tha Drejtorja Juridike pranë Këshillit të Lartë të Drejtësisë. Sipas saj, ky verifikim do të bëhet jo vetëm nëpërmjet bashkëpunimit me Inspektoratin e Lartë të Deklarimit dhe kontrollit të Pasurive por edhe me agjenci të tjera që do të ndihmojnë për të hedhur dritë mbi vërtetësinë e deklarimeve të bëra. Në këtë mënyrë KLD-ja do të nisë një verifikim paralel me ILDKP-në dhe pritet që të mbledhë informacione nga të gjitha institucionet shtetërore përfshirë edhe organet e hetimit apo shërbimin informativ.