10 Mars 2008

Fuoristrada përplaset me autobusin, vdes 31-vjeçari

Aksidenti ka ndodhur në superstradën Korçë-Kapshticë. Tmerr tek pasagjerët e autobusit që po shkonte në Greqi



KORÇË- Një aksident i rëndë automobilistik i ka marrë jetën dje një 31-vjeçari në Korçë por edhe ka terrorizuar pasagjerët e një autobusi që po udhëtonte drejt Greqisë. Kanë qenë plot 30 udhëtarë të një kompanie private që kanë përjetuar minutat e ankthit gjatë një aksidenti automobilistik me një të vdekur dhe një të plagosur në gjendje të rëndë. Si pasojë e aksidentit edhe qarkullimi i mjeteve në aksin që lidh Shqipërinë me Greqinë është bllokuar për disa orë të tëra. Aksidenti ka ndodhur pas përplasjes së një fuoristrade me një autobus me udhëtarë të linjës Tiranë-Athinë.



Ngjarja



Aksidenti i rëndë automobilistik është regjistruar në superstradën Korçë-Kapshticë në afërsi të fshatit Plasë, ndërsa mendohetqë shpejtësia e mjetit dhe humbja e kontrollit të kenë çuar drejtuesin e tij, drejt daljes në kah të kundërt dhe përplasjes pas autobusit me targa të kryeqytetit. Dëshmitarët okularë pohuan se ngjarja ndodhi rreth orës 15.30 në segmentin nacional Korçë-Kapshticë. Autobusi me targa "TR 1806 M" ka qenë me rreth 30 udhëtarë në bord, midis të cilëve dhe fëmijë. Në një moment, përballë autobusit është shfaqur një fuoristradë e bardhë me targa të Tiranës. Makina ka dalë nga korsia e saj duke u përplasur ballë për ballë me autobusin që vinte nga krahu i kundërt. Përplasja ka qenë tepër e fortë dhe drejtuesi i fuoristradës me traga "TR 0823 H", shtetasi Gazmir Grazhdani, banor i Tiranës, ka mbetur i vdekur në vend. Ndërkohë në aksident është plagosur dhe udhëtari tjetër i tij, shtetasi i identifikuar si Albert Daci. Viktima 31 vjeç ka pësuar dëmtime të jashtëzakonshme në trup duke mbetur i vdekur në vend, ndërsa shoku i tij është transportuar në gjendje të rëndë në spitalin e Korçës. Policia, e cila ka shkuar pak minuta më pas në vendin e ngjarjes, është përpjekur të veprojë me shpejtësi për të mundur të shpëtojë ndonjërin prej të aksidentuarve por kjo ka qenë e kotë. Burimet e policisë pohuan se kanë nisur hetimet për këtë ngjarje por ende nuk është përcaktuar shkaku i tragjedisë në rrugë. Hetuesit pohuan se dyshimet e para janë për një humbje të kontrollit nga ana e drejtuesit të fuoristradës ka bërë që mjeti të përfundojë në kahun tjetër të rrugës duke u përplasur fatalisht me autobusin e linjës Tiranë- Greqi.



Tragjedia në rrugë, në një nga segmentet më të qarkulluara të rajonit të Korçës ka krijuar për gati dy orë probleme serioze të qarkullimit rrugor. Reshjete shumta të shiut nga njëra anë si dhe mjegulla, por dhe mjetet zjarrfikëse dhe ato të shpëtimit gjatë ndërhyrjes në aksidente, kanë bllokuar lëvizjen e mjeteve në të dy anët e kësaj rruge. Me qindra automjete dhe udhëtarë në to janë vënë në radhë, ndërsa situata e cila ka qenë e pandryshuar për më shumë se dy orë është kushtëzuar nga heqja e fuoristradës e cila është përplasur me autobusin. Efektiva të shumta të policisë së qarkullimit rrugor kanë stabilizuar situatën me lëvizjet e mjeteve fillimisht me një kalim, deri në përmirësim të situatës.