15 Mars 2008

Biznesmeni u përlesh me agresorin
Lajmi konfirmohet nga burime të policisë, sipas të cilëve ekspertiza ka konkluduar se në trupin e viktimës janë gjetur disa shenja që konfirmojnë këtë dyshim. Pikërisht këto shenja të mbetura në trupin e viktimës mund të jenë ndër provat kyçe për të provuar shkencërisht autorësinë e krimit. Përleshja ka ndodhur pak momente para se mbi Mehmet Feleqin të derdheshin gjashtë plumba. Zbardhja e krimit duket se është ende larg, megjithë numrin e pistave dhe shoqërimit në polici të dhjetëra personave. Mësohet se gjatë ditës së djeshme në ambientet e policisë së Fierit janë shoqëruar dhe janë marrë në pyetje për ngjarjen rreth 30 vetë, ndër ta vëllezërit dhe babai i viktimës si dhe shumë të afërm të familjes. Burime zyrtare të policisë kanë thënë për gazetën “Panorama” se hetimi është përqendruar tashmë në dy pista. Njëra prej tyre është ajo e konfliktit të 32-vjeçarit për shkaqe banale me ndonjë bashkëmoshatar të tij, ndërsa tjetra e një grindjeje që ka pasur ai me një taksist, për të cilin po hetohet. Nisur nga këto të dhëna uniformat blu kanë marrë në pyetje edhe taksistin e të afërm të tij, por ende nuk është nxjerrë ndonjë urdhër-arresti. Ndërsa bëhet e ditur se policia ka hedhur poshtë pretendimet për mundësinë e një vrasjeje brenda familjes. Sipas grupit të ekspertëve në vendin e ngjarjes janë gjetur të gjitha gëzhojat që kanë qëlluar mbi të riun dhe pritet ardhja e përgjigjes nga Instituti i Kriminalistikës së Tiranës. Gjithashtu në pritje të rezultateve janë edhe kampionet e marra nga ekspertiza mjeko-ligjore mbi trupin e viktimës. Ngjarja e rëndë ka tronditur mbarë opinionin publik dhe sidomos banorët e zonës së Kurjanit. Fiqiretja, një 55-vjeçare ka treguar se Mehmeti ishte një djalë shembull i njeriut të mirë dhe ky krim i ka habitur pa masë. “Kam kaq kohë që jetoj afër familjes së tyre dhe nuk i kam dëgjuar të kenë pasur probleme as me ndonjë fqinj dhe as me njëri-tjetrin. Nuk e di se si ndodhi kjo e keqe. Unë i kisha 5000 lekë borxh Mehmetit, por ai nuk më pati kërkuar të nxitohesha për t’ia kthyer. Më pati thënë që t’ia ktheja kur të kisha mundësi. Ishte zemërmadh. Të gjithë i thoshim që t’i bëheshin të mira këto që po na bënte neve, por nuk paska drejtësi”, u shpreh më tej Fiqiretja. Mehmet Feleqi, u gjet i vrarë mëngjesin e së enjtes në një fabrikë mielli, e cila ishte në pronësi të tij, në fshatin Ngjeqar. Trupi i pajetë u zbulua nga vëllai i tij. Policia pohoi se Feliqi kishte gjetur vdekjen pas gjashtë plagëve të marra nga një armë zjarri