9 Mars 2008 - Mitmarrja,

Mitmarrja, hetim pesë mjekëve dhe infermiereve

TIRANË- Njësia e Task-Forcës së krimit ekonomik ka filluar hetimet ndajmjekëve dhe infermiereve të denoncuar në emisionin "Fisk-Fare" për abuzimin me detyrën, edhe pse drejtoria e Qendrës Spitalore Universitare "Nënë Tereza" i ka pezulluar nga detyra. Burimet zyrtare pranë organit të akuzës konfirmuan lajmin, duke shtuar se pas denoncimit në media të skandalit të mjekëve dhe infermierë të spitalit nr. 5, prokuroria ka filluar hetimet për akuzën e "mitmarrjes". Gjithashtu, mësohet se edhe Drejtoria e QSUT-së ka ngritur një grup pune për të analizuar rastin e denoncimit, ku mjekët janë filmuar duke bërë pazar me familjarët për një operacion. "Menjëherë pas denoncimit të këtij skandali, me urdhër të ministrit të Shëndetësisë, Nard Ndoka, drejtoria e spitalit "Nënë Tereza", dy ditë më parë ka pezulluar nga detyra të gjitha infermieret dhe mjekun, që janë filmuar duke marrë para për operacionin e kryer",-thuhet nga burimet zyrtare të QSUT-së. Vetëm tre ditë më parë, u denoncua rasti flagrant ku pas kryerjes së operacionit, të afërmit e pacientit zhvateshin nga infermierët dhe mjeku anestezist. Sipas pamjeve filmike, pas marrjes së pacientit për të kryer operimin, të afërmit vrapuan nëpër farmacitë rreth e rrotull spitalit, që të gjenin shampo, betadinë për dezinfektimin e vendit ku do të bëhej ndërhyrja kirurgjikale, sepse spitali nuk kishte. Pasi ia dorëzuan betadinën infermieres, pacienti u fut në sallën e operimit. Por me të mbaruar operacioni, infermierët u komunikuan pagesat që duhej të bënin familjarët për punën e kryer prej tyre. Pagesat sipas pamjeve fillonin nga 1000 apo 2000 lekë për çdo infermiere, deri në 5000 lekë për kryeinfermieren. Plot 5000 lekë për anestezistin, si dhe shuma më e majme prej 25000-30000 lekësh për mjekun që kreu operacionin.