9 Mars 2008 - Varka e vdekjes

Varka e vdekjes nxirret nga liqeni

TIRANË- Varka që u mori jetën 16 personave është nxjerrë dje në bregun e liqenit të Farkës. Mesditën e djeshme, me urdhër të drejtuesve të prokurorisë së kryeqytetit, varka e vdekjes është nxjerrë në breg, me qëllim kryerjen e akt-ekspertimit të saj. Aktualisht, organi i akuzës së kryeqytetit është duke kryer hetime për të nxjerrë një përfundim zyrtar mbi shkaqet e përmbysjes së motobarkës me 16 shtetasit që gjetën vdekjen. Gjithashtu, konfirmohet se pas nxjerrjes së kësaj varke, policia ka sekuestruar disa sende të viktimave të gjetura brenda saj. "Pas nxjerrjes në sipërfaqe të motobarkës, punonjësit e policisë kanë gjetur dhe sekuestruar brenda saj disa çanta, rroba të ndryshme si çizme, këpucë dhe ushqime, që mendohet se viktimat kishin marrë me vete nga lokali ku kishin festuar ditëlindjen e njërit prej viktimave të kësaj tragjedie",-thuhet nga burimet e prokurorisë. Të gjitha këto sende të gjetura brenda motobarkës do t'i nënshtrohen ekzaminimit të ekspertëve të mjekësisë ligjore.
Prokuroria e ka konsideruar varkën e tragjedisë si një provë të rëndësishme, për të zbuluar shkakun e mbytjes së 16 personave, mes të cilëve gra edhe fëmijë. "Motobarka është e një kapaciteti prej 8 vendesh dhe e mbuluar me qese najloni të fortë dhe me dyer të të njëjtit material. Pas përmbysjes, ka qenë e pamundur për shumicën nga viktimat që të shqyenin materialin nga i cili përbëhej varka, pasi dera ishte mbyllur dhe nuk hapej. Mendohet se pas përmbysjes, viktimat janë mbytur nga asfiksimi dhe paniku i krijuar në varkë, për shkak se fundosja ka qenë shumë e shpejtë",-thuhet nga prokuroria. Gjithashtu, duket se varka ishte plotësisht e mbuluar nga plastmasi dhe kjo mund të ketë sjellë edhe izolimin e pjesëtarëve të 6 familjeve, të cilët nuk mundën të shpëtonin. Pas nxjerrjes në sipërfaqe, ka qenë policia ajo e cila e ka shoqëruar më tej transportimin e varkës për t'u kontrolluar nga organet hetimore.

Prokuroria e Tiranës, menjëherë pas kësaj tragjedie të ndodhur katër ditë më parë, filloi hetimet për zbardhjen e përmbysjes së varkës, ku humbën jetën 16 pjesëtarët efamiljeve Osmani, Sinani, Spahiu, Hysaj, Blamo dhe Dibra.

Mësohet se pjesë e fashikullit të hetimit është bërë edhe licensa e lokalit, i njohur me emrin "Liqeni i Farkës", ku prokuroria ka sekuestruar të gjitha dokumentet që pronari i lokalit i kishte nxjerrë për aktivitetin e tij privat, duke verifikuar posedimin e lejes së pronarit të ndjerë të lokalit, për aktivitetin e tij dhe lejen për transportimin e klientëve me varka. Gjithashtu, në ditët në vazhdim pritet të merren në pyetje tre të mbijetuarit e kësaj tragjedie: Beqir Sina, Luana Spahiu dhe Romina Hysaj, të cilët do pyeten pas normalizimit të gjendjes së tyre emocionale. Për prokurorinë, pyetja e të mbijetuarve është e domosdoshme dhe dëshmitë e tyre mund të hedhin dritë në zbardhjen e shkakut të përmbysjes së varkës me 19 persona në bord. Ngjarja e kobshme ka ndodhur vetëm katër ditë më parë, ku pas festimit të ditëlindjes së 21-të për Alban Hysën kanë gjetur vdekjen 16 pjesëtarët e familjeve që kishin lidhje gjaku e krushqie me njëra-tjetrën. Fillimisht, ata kanë këmbëngulur që pronari i lokalit, Afrim Dibra, të mos i hipte të gjithë në varkë, por sipas dëshmive, ky i fundit i kishte siguruar se nuk kishte asnjë rrezik, duke shkaktuar kështu njërën prej tragjedive më të rënda dhe më të dhimbshme të ndodhura në vend