11 Mars 2008

Deputetët e PD i ankohen Berishës: Ministrat s'na përgjigjen
Ministrat s'mbajnë lidhje me deputetët e PD-së. Kërkohen sqarime edhe për grantet
TIRANË- Ministrat duhet të mbajnë kontakte më të shpeshta me deputetët pasi ata i kanë shkëputur lidhjet me ta. Deputetët demokratë i janë "ankuar" dje kryeministrit Berisha se në mjaft raste, ministrat nuk mbajnë lidhjet e duhura me deputetët, për probleme të ndryshme që ngrihen nga këta të fundit. Gjithçka ka ndodhur në mbledhjen e djeshme të grupit parlamentar të PD-së, aty ku deputetët mund të kontaktojnë me kreun e PD-së lidhur me shqetësimet për qeverisjen dhe zonat e tyre elektorale. Ka qenë deputeti i Partisë Demokratike, Preç Zogaj ai që ka ngritur dje zërin dhe ka kërkuar që ministrat të kenë kontakte të vazhdueshme me deputetët demokratë dhe të japin sqarime lidhur me problemet që ngrenë deputetët, e që më së shumti kanë të bëjnë me zonat e tyre elektorale. Sipas Zogaj, në mjaft raste këto sqarime mungojnë apo janë shumë të rralla ndaj dhe deputeti i PD-së i është drejtuar ministrave duke kërkuar që ata të jenë më të lidhur me deputetët në këtë aspekt.
Por, një tjetër shqetësim që ka ngritur deputeti i Lezhës, Preç Zogaj ka qenë dhe ai që lidhet me buxhetin e shtetit që ndahet në muajin korrik, i cili është quajtur nga qeveria buxheti suplementar, që kryesisht është përdorur për investime në infrastrukturë dhe rritje pagash. Zogaj ka kërkuar nga kryeministri Berisha që, për këtë buxhet të ketë një projekt paraprak, në të cilin të parashikohet se si do të ndahen fondet për zona të ndryshme të vendit, e sidomos në ato zona ku të zgjedhur janë deputetët e PD-së. Për Zogajn, kjo duhet të bëhet në mënyrë që të mos ketë të pakënaqur atëherë kur të bëhet zbatimi i buxhetit, në korrik. Një kërkesë e tillë, sipas burimeve, duket se ka gjetur edhe mirëkuptimin e Kryeministrit Berisha, i cili ka shprehur miratimin e tij që të hartohet një projekt lidhur me mënyrën se si do të ndahen investimet. Duke folur për buxhetin, deputeti Zogaj ka kërkuar që të ketë më shumë transparencë dhe informacion nga qeveria, ministrat, lidhur me grantet e ndryshme që jepen për investime, në mënyrë që çdo deputet të jetë i përgatitur për t'i dhënë sqarime zgjedhësve të vet. Në mbledhjen e djeshme të grupit të PD-së fjalën e ka marrë edhe deputeti Rexhep Uka, i cili ka kërkuar që të hartohet një dokument, në të cilin të paraqiten të gjitha rezultatet dhe arritjet e qeverisë në fushën e reformave, në mënyrë që deputetët të mund t'i prezantojnë në bazë këto arritje. Këtë kërkesë, Uka e ka argumentuar edhe me faktin se demokratët do të përballen shumë shpejt me zgjedhjet parlamentare dhe për këtë u duhet të informojnë elektoratin e tyre me arritjet e qeverisë.