11 Mars 2008

Ndërpritet energjia, bllokohet Kakavija për dy orë
Ndërprerja nisi në orën 08.00 deri në 10.00 dhe u pasua nga një radhë deri 1.5 km. Automjetet në pritje deri pasdite
Sipas autoriteteve, problem solli dyndja e shkaktuar nga festimet e Karnavaleve në 9 mars në Greqi
Kakavijë-Problemet në sistemin kompjuterik për shkak të mungesës së energjisë në palën greke kanë bllokuar për dy orë punën në doganën e Kakavijës. Bllokimi i punës është pasuar nga një radhë e gjatë automjetesh me emigrantë, deri në 1.5 kilometër në pritje për të kaluar kufirin. Prej orës 08.00 e mëngjesit të djeshëm e deri në 10.00 të paradites, të dy sportelet e kontrollit të pasaportave në pjesën kufitare greke nuk kanë funksionuar.
***
Kjo periudhë 120 minutëshe krijoi një radhë fillimisht në zonën fqinje e më pas u dendësua deri në të dalë të territorit shqiptar. Në orën 14:30 radha e automjeteve që prisnin për të kaluar traun e doganës greke arriti deri në 1 km e gjysmë. Të shqetësuar nga kjo gjendje autoritetet drejtuese të Stacionit Kufitar të Kakavijës, kanë marrë kontakt të menjëhershëm me homologët grekë për të gjetur rrugët e zgjidhjes nga situata. Përgjatë gjithë ditës së djeshme, radhët kanë qenë të shfaqura si rrjedhojë e ngadalësisë në përpilimin e dokumentacionit nga ana e grekëve si dhe numri i paktë i sporteleve kontrolluese vetëm në dy. Ndërsa pala shqiptare, ndonëse me tre sportele, nuk haste probleme në përpunimin e dokumentacionit të personave dhe automjeteve pasi gjithçka ishte në varësi të kontrollorëve grekë.
***
Sipas të dhënave zyrtare, pas kontakteve që patën me homologët, dyndja e automjeteve kryesisht me targa greke në Kakavijë është justifikuar edhe me numrin e madh të personave që udhëtonin drejt shtetit fqinj. "Ka pasur numër të madh personash,të cilët kishin ardhur ditë më parë për të kaluar festën e karnavaleve që në Greqi mban datën e 9 marsit",- kanë thënë burimet zyrtare. Banorët e zonave të minoritetit në Sarandë, Delvinë dhe Gjirokastër, tradicionalisht e festojnë këtë ditë, por kësaj radhe ardhja e tyre në një intensitet të madh, krijoi një situatë të ngjeshur në pikën e kalimit kufitar. Autoritetet kanë theksuar se ashtu si ka ndodhur edhe herë të tjera të radhëve të gjata, emigrantët nuk kanë preferuar kalimin në pikat e tjera alternative të Sopikut dhe Tri Urave. Një grevë e përgjithshme e punonjësve të sistemit energjetik në Greqi, shpeshherë gjatë tri javëve të fundit, ka krijuar probleme serioze në funksionimin e punës në doganën greke të Kakavijes, por dje ndërprerja e energjisë ka qenë e dukshme mjaft në orët e ditës. Kanë mjaftuar vetëm dy orë, që kontrollorët grekë të ndërpresin punën. Gjë që e kanë bërë në shumë raste të tjera, sidomos për festa duke e shndërruar Kakavijën në pikën më të populluar nga emigrantët që qarkullojnë nga të dy anët e kufirit. Sipas të dhënave policore mësohet se dje kanë shkuar mbi 2 mijë shtetas shqiptarë dhe 233 automjete përfshirë edhe ato të transportit të udhëtarëve.