11 Mars 2008

Trafiku i kurdëve, 27 vjet burg krerëve të rrjetit
Krimet e Rënda dënojnë turkun Ozul dhe dy bashkëpunëtorët e tij shqiptarë
TIRANË- Gjykata e Krimeve të Rënda vendosi dënimin me 27 vjet burg për tre të pandehurit që trafikonin klandestinë, në kuadër të grupit të strukturuar kriminal nga Shqipëria në Itali. Sipas vendimit të gjykatës, shtetasi turk Yasin Ozul deklarohet fajtor për kryerjen e veprës penale të "organizimit, drejtimit dhe financimit të trafikut të klandestinëve" në kuadër të grupit të strukturuar kriminal dhe dënohet me 10 vjet burg. Ndërsa dy të pandehurit shqiptarë, të akuzuar si bashkëpunëtor në këtë rrjet, Klement Frroku dhe Ali Ademi kanë kryer veprën penale të trafikut të klandestinëve dhe dënohen me 9 dhe 8 vjet burg. Ndërkohë, prokurori i çështjes në leximin e konkluzioneve përfundimtare kërkoi nga gjykata dënimin e tre të pandehurve me 29 vite burg e 18 milionë lekë gjobë.
Sipas fjalës së prokurorit Nezha, gjykata duhet të dënojë me 10 vjet burg e 6 milionë lekë gjobë Ali Ademin; të njëjtën masë dënimi për turkun Yasin Ozel, ndërsa për të pandehurin tjetër, Kelmend Frroku u kërkua dënimi me 9 vjet burg e 6 milionë lekë gjobë. Tre të pandehurit akuzohen për veprën penale të "dhënies ndihmë për kalimin e paligjshëm të kufirit, në kuadër të grupit të strukturuar kriminal". Ndërsa për të pandehurin e katërt, Ayhan Dogan, u veçua çështja penale, për shkak se nuk e pranoi akuzën. Të pandehurit u arrestuan afërsishtnjë vit më parë, pasi dyshoheshin si anëtarë të një rrjeti që merrej me trafikimin e kurdëve nga Turqia drejt Italisë. Çdo kurd i trafikuar duhej të parapaguante një shumë prej 3 mijë eurosh, për të mbërritur në Evropë.