11 Mars 2008

Vdes nga infarkti i dënuari për plagosje
TIRANË- Ndërroi jetë në qelinë e burgut të Peqinit, si pasojë e një infarkti 24- vjeçari Besnik Tatoshi, i dënuar për plagosje me thikë nga Gjykata e Elbasanit. Burime nga burgjet pohojnë se Tatoshi, i dënuar për tentativë vrasjeje prej tre muajsh ishte dërguar në qelitë e burgut të Peqinit, pasi dënimi për të kishte marrë formë të prerë. Që nga momenti i izolimit në këtë burg, ai ka pasur probleme të sëmundjes së trombozës për të së cilën i është nënshtruar dy operacioneve kirurgjikale në zorrë.
Mjekët gjatë operacioneve kanë konstatuar se sëmundja nga e cila ai vuante i ishte shfaqur që kur kishte lindur dhe e kishte shoqëruar për gjithë jetën. Pasditen e së dielës, gjendja e tij shëndetësore është përkeqësuar jashtë mase, ç'ka ka detyruar autoritetet e burgut për ta nisur me urgjencë për në Tiranë, por tatoshi ka ndërruar jetë gjatë rrugës. Trupi i pajetë i tij ka mbërritur në spitalin e Burgjeve, ndërsa më pas është dërguar në morg ku gjatë paradites së djeshme i është bërë autopsia dhe i është dorëzuar familjarëve të tij, për të kryer ritet mortore.